Vegagerðin eitrar víða enn. – Hvar má tína ber?

Vegagerðin heldur uppteknum hætti og stundar eiturefnahernað gegn náttúrunni. Eiturefnin berast oft langar leiðir og langt umfram veghelgunarsvæði yfir á lönd annarra.

Fólk hlýtur að eiga ótvíræðan rétt á að vita, hvort Vegagerðin hafi úðað eitri á plöntur við vegarbrún eða ekki. Eiturúði berst auðveldlega allt að 400 metra frá vegi.

Nú er gríðarlega mikil berjaspretta víða um land og án efa mun fólk sækja stíft í að tína. Oft þarf ekki að fara langt frá vegi og freistast fólk því til þess að tína, þar sem það rekst fyrst á berjaklasa. Almenningur trúir því, að villt ber séu af hinu holla og góða í ríki náttúrunnar.

En ber, sem Vegagerðin hefur úðað með Roundup eða öðru álíka eiturefni, geta vart talizt hollustufæða. Eiturefnið Roundup var lengi talið skaðlaust öðrum lífverum en plöntum, en margir voru þó vantrúaðir á þá fullyrðingu. Nú á allra síðustu mánuðum hafa komið fram fjölmargar vísbendingar um, að Roundup sé miklu mun skaðlegra en áður var haldið.

Það er skýlaus krafa almennings, að starfsmenn Vegagerðar hætti þessu ráðslagi eða setji alltént upp aðvörunarskilti á þessum stöðum, því að fólki, sem fer til berja í námunda við eitruðu vegina, stafar veruleg hætta af þessu framferði.

Rvík 17. ágúst 2016

Ágúst H. Bjarnason

P.s. Myndir tók Oddur Sigurðsson á Tjörnesi og í Kelduhverfi fyrir skömmu.

Sjá ennfremur: http://ahb.is/eiturefnahernadur-med-vegum/

P.s.

Mér er nær að halda, að það þurfi að betrumbæta margt hjá stofnun, sem hagar sér á þennan veg. Það rifjaðist upp fyrir mér viðtal við mann, sem hafði unnið nær allan sinn aldur hjá Vegagerðinni og hafði þetta að segja við starfslok:

„En skynsemin hefur ekki alltaf ráðið hjá Vegagerðinni. – Það er margt ekki í lagi hjá þessari stofnun. – Stjórnunarstíll Vegagerðarinnar er „þetta reddast.“ – Margir yfirmenn Vegagerðarinnar tuddast áfram oft án skynsemi eða fyrirhyggju takandi ekkert tillit til lægra setts starfsfólks, skoðana þeirra og starfsöryggis.” – Svo mörg voru þau orð. Það er ekki von á góðu hjá slíkri stofnun.