Mosajafnaætt – Selaginellaceae

Mosajafnar – Selaginella P. Beauv.

Smækkunarorð af lat. selago, gamalt plöntunafn; e.t.v. af keltnisku sel, syn, heilsusamlegur (við augnsjúkdómum). Um 700 tegundir teljast til kvíslarinnar (1 hér). Gróblöð í ax-leitri skipan á stöngulenda. Gró misstór.

Mosajafni – Selaginella selaginoides (L.) P. Beauv.

Aðalstöngull stuttur, jarðlægur með uppsveigðar eða uppréttar, kvíslóttar greinar. Uppsveigðir stönglar mislangir; ófrjóir að 5 cm, gróbærir 8-10 cm. Blöð 1-3 mm á lengd, 1 mm á breidd, egglaga, oddmjó og þorntennt. Gróblöð í 1-6 cm langri ax-leitri skipan, sem er gildust efst, gulnar við þroskun; um helmingi lengri en venjuleg blöð. Neðst í gróberanum myndast fjögur stórgró við hvert gróblað, en efst þroskast mörg smágró í nýrlaga hirzlum. Líkist mosa við fyrstu sýn, en er auðþekktur á gróbærum sprotum.

2-10 cm á hæð. Vex í margs konar þurrlendi. Algengur um land allt.

Enska: Lesser Clubmoss, Northern Spike-moss
Danska: Dværg-Ulvefod
Sænska: Dvärglummer
Norska: Dvergjamne
Finnska: Mähkä
Þýzka: Tannen-Moosfarn, Gezähnter Moosefarn
Franska: Sélaginelle, Fausse Sélagine, Sélaginelle spinuleuse