https://www.youtube.com/watch?v=x1SgmFa0r04
Á meðfylgjandi myndbandi má sjá á þremur mínútum og sex sekúndum, dag fyrir dag, hvernig vindar blésu á norðurhveli jarðar 2006 og feyktu með sér mengandi lofttegundum þúsundir kílómetra frá náttúrlegum brunnum og iðnaði ásamt ýmsum efnum öðrum, sem myndast vegna athafnasemi mannsins.
Því rauðari flekkir þeim mun meira koldíoxíð (CO2), en það mun hægt og bítandi leiða til hærri hita á jarðarkringlunni.
Þegar vorið gekk í garð, fönguðu plönturnar koldíoxíðið og rauði liturinn dofnaði.
En það er fleira á myndinni. Á suðurhveli barst kolmónoxíð (CO), um himinhvolfið, en það átti upptök sín við bruna í Afríku, Ástralíu og Suður-Ameríku. Myndin sýnir glögglega, hvernig efnið berst langt frá uppruna sínum. Minna má á, að kolmónoxíðið, litað grátt í myndinni, er okkur mun hættulegra en koldíoxíð.
Það voru sérfræðingar NASA, við Goddard Space Flight Center, sem útbjuggu myndbandið með hjálp risa stórrar tölvu.
ÁHB / 22. nóvember 2014
